Gipalapdan sa Department of Agriculture ang pagpalambo sa industriya sa palm oil sa Pilipinas aron maminusan ang dakong pagsalig sa imported nga suplay ug makahatag og dugang oportunidad sa mga mag-uuma ug lokal nga negosyante.
Nagkanayon si DA Secretary Francisco P. Tiu Laurel Jr., usa ka maayong oportunidad ang pagpalig-on sa palm oil sector tungod sa taas nga panginahanglan sa merkado, lakip na ang posibilidad nga mahimong lokal nga materyales alang sa mas limpyo nga klase sa fuel.
Gipangayo sa DA ang unang ₱300 milyon nga pondo alang sa palm oil development program sa 2027 budget, samtang gisugyot usab ang hangtod ₱1 bilyon nga tinuig nga pondo sulod sa lima ka tuig kon mapasar ang balaod alang sa maong industriya.
Ubos sa roadmap sa gobyerno, tumong nga mapalambo ang 300,000 ektarya nga palm oil plantations sa nasud, lakip ang target nga makaabot og 100,000 ektarya sa dili pa matapos ang 2028.
Suportado usab sa DA ang Palm Oil Bill ug gisugyot ang pagbutang og dedikadong grupo sa Philippine Coconut Authority aron mas paspas ang pagpatuman sa mga programa para sa palm oil sector.
