Gigahin sa gobyerno ang P1 bilyon alang sa University of the Philippines o UP System aron mapalig-on ang Project NOAH ug mapauswag ang sayong pag-ila sa hulga sa baha ug uban pang kalamidad.
Gimandoan ni Pangulong Ferdinand Marcos Jr. ang Department of Budget and Management o DBM nga ipagawas ang maong pondo alang sa pagpalambo sa Project NOAH pinaagi sa artificial intelligence o AI, real-time nga pagmonitor sa mga peligro ug pagtagna sa posibleng pagbaha.
Sumala ni Presidential Communications Office o PCO Undersecretary ug Palace Press Officer Claire Castro, P935 milyon sa maong pondo ang alang sa mga serbisyo sa pagtuon, samtang P65 milyon ang gigahin alang sa pagdumala ug administrasyon sa proyekto.
Lakip sa paggamit sa pondo ang pagpalit sa gikinahanglang kagamitan, pagpalambo sa teknolohiya ug pag-apil sa mga eksperto aron mapalig-on ang kapasidad sa Project NOAH sa pagmonitor ug pagtagna sa mga peligro.
Pinaagi sa AI-enhanced modeling, LiDAR mapping ug data analytics, gilauman nga makahatag ang proyekto og real-time nga impormasyon ug mas tukmang prediksyon bahin sa posibleng pagbaha ug uban pang katalagman.
Dugang pa niini, gilauman nga makatabang ang Project NOAH sa mga ahensya sa nasodnong gobyerno ug lokal nga pangagamhanan sa paghimo og mas paspas ug tukmang mga desisyon, ilabi na sa pagpangandam ug pagpatuman sa hustong mga lakang sa dili pa moabot o mograbe ang usa ka kalamidad.
Gipunting usab nga ang maong inisyatiba nagtumong sa pagpalig-on sa pagpangandam ug paglikay sa kalamidad, inay nga magsalig lamang sa pagresponde human na mahitabo ang katalagman.
Sa kasamtangan, gilauman sa gobyerno nga ang mas abante nga teknolohiya ug real-time nga datos makatabang sa mga awtoridad ug komunidad sa mas sayong pagpangandam ug pagresponde batok sa baha ug uban pang hulga.
