Gitunol sa Department of Environment and Natural Resources Regions XI ug XIII ang nakumpiskang forest products ngadto sa mga komunidad sa Davao Occidental nga naapektuhan sa 7.8-magnitude nga linog.
Ubos sa direktiba ni DENR XI Regional Executive Director Atty. Ma. Mercedes V. Dumagan, nakonsolida ang 11,602 board feet nga forest products, diin 4,550 board feet nga lumber ang unang gitugyan sa Municipality of Sarangani niadtong Agosto 13.
Lakip niini ang Lauan, Tanguile ug Binuang lumber gikan sa CENRO Baganga ug CENRO Manay nga gamiton sa relief ug rehabilitation sa grabeng naapektuhang barangay.
Samtang, nagdonar usab ang DENR XIII og 9,019.55 board feet nga lumber ug 3.10 cubic meters nga Yakal poles ngadto sa Jose Abad Santos.
Gitransportar ang mga materyales pinaagi sa koordinasyon sa lokal nga panggamhanan, DPWH, Philippine Army, barangay officials ug MENRO personnel didto.
Ang mga donasyon gamiton sa pag-ayo ug pagtukod pag-usab sa mga balay nga nadaot sa linog ug ubang kalamidad. | VIA BOMBO EROS PAJOTA
