Mipadayag og baroganan ang Iran nga dili niini ablihan ang Strait of Hormuz hangtod dili dawaton sa Estados Unidos ang mga kondisyon sa Tehran aron matapos ang gubat sa rehiyon.
Matud ni Mohsen Rezaei, secretary sa Iran’s Supreme National Security Council, kinahanglan tapuson sa US ang gubat ug bayran ang frozen assets sa Iran.
Gusto usab sa Tehran nga maapil sa bisan unsang kasabutan ang paghuman sa mga panagbangi sa Lebanon ug Gaza.
Dungang pa ni Rezaei nga bisan adunay posibleng kasabutan uban sa Oman kabahin sa luwas nga shipping route, lahi gihapon kini sa desisyon sa Iran kung kanus-a ibalik ang normal nga operasyon sa Strait of Hormuz.
Samtang, nangayo usab si U.S. Pres. Donald Trump og kompensasyon gikan sa Iran alang sa mga kadaot nga iyang giingong resulta sa mga gubat ug pag-atake sa miaging mga dekada.
Tungod sa padayon nga tensyon, nabantayan usab ang pagsaka sa presyo sa lana, samtang nagpadayon ang diplomatic efforts sa Pakistan, Qatar ug Oman aron mapaduol ang US ug Iran sa usa ka kasabutan.
| via Bombo Ray Ann Martinez
