Gihimakak sa kampo ni kanhing Congressman Jing Paras nga adunay ₱5.5 milyong suhol nga gihatag ngadto sa giingong talent manager nga si alyas Ken.
Matud ni Atty. Mark Tolentino, abogado ni Paras, financial assistance lamang ang maong kantidad alang sa seguridad ug ubang gastos sa mga testigong giingong adunay impormasyong aduany kalabotan kang Executive Secretary Ralph Recto.
Gikanayon ni Tolentino nga boluntaryong miduol kanila si alyas Ken ug nangayo og tabang sa paghimo sa affidavit, hinungdan nga ilang gitabangan sa legal nga dokumentasyon.
Matud pa sa abogado, nahadlok ang mga testigo sa ilang kaluwasan tungod kay taas nga opisyal ang ilang giingong atubangon.
Samtang, plano usab ni Paras nga magsang-at og perjury complaint batok sa mga indibidwal nga nag-akusar kaniya.
Una nang giingon ni NBI Director Melvin Matibag nga giingong adunay suhol nga gitanyag aron maghimo og istorya batok kang Recto, nga subling gihimakak usab sa kampo ni Paras.
