Gilusad na sa Davao City Police Office ang imbestigasyon batok sa pipila ka police personnel tungod sa mga report ug alegasyon sa giingong dili angay nga pamatasan ug misconduct sa Maa ug Calinan.
Matud sa DCPO, seryoso nilang gitagad ang tanang alegasyon batok sa mga pulis ug gipasalig nga patas ug walay pagpabor ang imbestigasyon aron matino ang tinuod nga nahitabo.
Samtang nagpadayon ang pagsusi, temporaryong gibalhin sa administrative holding units ang mga personnel nga nalambigit aron dili maapektuhan ang dagan sa imbestigasyon.
Gipunting sa DCPO nga padayon nilang ipatuman ang mga lagda sa professionalism, integrity ug pagtahod sa human rights sa tanang police units sa siyudad.
Kung mapamatud-an nga adunay misconduct, administrative violation o criminal liability, pasakaan og tukmang disciplinary ug legal action ang responsable nga personnel.
Gihangyo usab sa DCPO ang publiko ug media nga tugotan ang due process samtang ginatigom ug ginarepaso sa investigators ang tanang facts sa maong mga insidente. | VIA BOMBO EROS PAJOTA
