Gihangyo sa Malacañang ang mga senator-judges nga magpabiling patas ug walay pagdapig sa pagdumala sa impeachment trial batok kang Vice President Sara Duterte ug likayan ang paglihok nga daw mga abogado sa kaso.
Gihimo ni Palace Press Officer Usec. Claire Castro ang maong pahayag human gipangutana sa assessment sa Malacañang sa ika-13 nga adlaw sa impeachment trial, ilabina sa mga pangutana ni Senador Imee Marcos ngadto sa testigo nga si Atty. Roderick Wamil.
Sumala pa ni Castro, katungdanan sa mga senator-judges ang pagpangutana lamang aron maklaro ang mga isyu ug dili ang pagpahigayon og cross-examination o pakiglalis sa mga testigo. Dugang pa, nga ang ebidensya ug kamatuoran ang kinahanglan magmadaogon sa impeachment trial.
Dugang pa niini, iyang giingon nga adunay pipila ka senator-judges nga, sumala sa iyang obserbasyon, daw naglihok isip mga abogado inay nga mahimong walay pagdapig nga mga hukom.
Lakip sa iyang gipahayag ang pag-awhag nga dili angay “walison ang kamatuoran” sa Senado, apan hatagan kini og hustong pagtagad atol sa paghusay sa kaso.
Sa laing bahin, gilimod ni Castro ang mga alegasyon nga adunay politikal nga motibo ang desisyon sa Korte Suprema sa pagbasura sa mga petisyon nga may kalabotan sa impeachment proceedings.
Sumala pa kaniya, mas angay nga ipunting ang diskusyon sa legal nga mga isyu kay sa mga alegasyong walay lig-ong basehan.
Gipunting usab sa Malacañang ang pagtahod sa desisyon sa Korte Suprema nga nagbasura sa duha ka petisyon nga nagkuwestiyon sa impeachment proceedings.
Matud pa ni Castro, gibasura ang mga petisyon tungod kay wala na ang maong isyu sa House of Representatives ug anaa na kini sa Senado nga naglingkod isip impeachment court.
Dugang pa niini, mitubag na usab ang Kamara sa mga isyung gihisgutan sa desisyon sa Korte Suprema.
Sa kasamtangan, giingon ni Castro nga usa sa labing klarong panig-ingnan sa iyang namatikdang pagkapihig sa impeachment trial mao ang baruganan nga ang Special Disbursing Officer (SDO) lamang ang angay manubag.
Gipasiugda niya nga dili angay kalimtan nga adunay responsibilidad usab ang pangulo sa usa ka ahensya sa pagdumala ug paggamit sa pondo sa gobyerno.
