Nangandam si Department of Health (DOH) Secretary Jose “Brix” Pujalte Jr. nga makigtambayayong sa imbestigasyon may kalabotan sa giingong kadudahan nga pagsuspenso sa pagpalit sa mga tambal batok sa tuberculosis (TB).
Gipahayag kini sa opisyal samtang iyang gihimakak ang mga alegasyon batok kaniya.
Matod ni Pujalte, wala pa gani siya makaabot og 30 ka adlaw sa iyang puwesto, apan adunay gustong ipadali ang pag-apruba sa P3 bilyon nga pondo alang sa pagpalit sa mga tambal batok sa TB nga wala pa maagian sa hustong pagrepaso.
Giingon pa niya nga dako kaayo ang kantidad sa pondo ug kinabuhi sa mga pasyente ang nameligro, busa kinahanglan nga masusi pag-ayo ang maong procurement.
Dugang pa niini, kinahanglan makat-on ang gobyerno sa nahitabo kaniadto sa isyu sa Pharmally.
Ang maong pahayag misunod human ang mga health advocates ug health workers misumite og sulat ngadto sa Office of the Ombudsman nga naghangyo nga tangtangon si Pujalte sa iyang katungdanan tungod sa giingong pagsuspenso sa procurement sa mga tambal batok sa TB ug uban pang may kalabutang medical commodities.
Matod sa mga nagreklamo, ang gihimong aksyon sa kalihim mahimong ikonsiderar nga grave misconduct, grave abuse of authority, ug conduct prejudicial to the best interest of the service, nga mahimong hinungdan sa iyang pagtangtang sa serbisyo publiko.
Giingon usab nila nga adunay gitakdang iskedyul sa procurement ubos sa balaod aron malikayan ang pag-abuso sa gahum sa pagdesisyon.
Matod pa nila, ang walay legal nga basihan nga walay taning nga pagsuspenso sa procurement mahimong ikonsiderar nga iligal nga pagsabotahe sa open competitive bidding.
Sa laing bahin, gipahayag ni Secretary Pujalte nga iyang gitahod ang mandato ug proseso sa Office of the Ombudsman.
Gipasabot usab niya nga kon iyang giaprobahan dayon ang procurement, posible usab siyang kuwestiyonon nganong dali niya kini gipirmahan.
Busa, mas gipili niya nga tun-an una pag-ayo ang maong dako nga kantidad sa pondo, sundon ang hustong proseso, ug masiguro nga dekalidad ang mapalit nga mga tambal.
