Mipasaka si Senador Jinggoy Estrada og petition for bail sa Sandiganbayan Fifth Division aron makapiyansa sa iyang giatubang nga kasong plunder.
Sumala sa petisyon, nangayo ang senador og temporaryong kagawasan samtang nagpadayon ang pagdungog sa kasong may kalabotan sa giingong korapsyon ug kickback scheme sa mga flood control projects.
Kahinumduman nga naggikan ang kaso sa alegasyong nakatigom si Estrada og giingong iligal nga kabtangan nga mokabat sa ₱573 milyon. Dugang pa niini, mipasaka si Estrada sa maong petisyon human ibasura sa Sandiganbayan niadtong Hulyo 24, 2026 ang iyang unang mosyon alang sa fixed bail, nga giingong wala pa sa hustong panahon.
Sumala pa sa Sandiganbayan, dili pa mahimong mohukom ang korte sa kantidad sa piyansa hangtod adunay pormal nga aplikasyon ug hearing aron masuta kon lig-on ba o dili ang ebidensya sa prosekusyon. Sa bag-ong petisyon, gibarugan sa kampo ni Estrada nga walay lig-on nga ebidensya nga nagpakita nga nakigsabwatan siya kang kanhi DPWH Secretary Manuel Bonoan ug sa ubang kaubang akusado sa giingong anomalya.
Sa pagkakaron, gipaabot ang pagtakda sa Sandiganbayan sa hearing aron resolbahon ang hangyo sa senador nga makapiyansa
