Magpahigayon si U.S. President Donald Trump og tagsa-tagsa nga pakigpulong uban nila Ukraine President Volodymyr Zelensky ug Israeli Prime Minister Benjamin Netanyahu sa White House karong adlawa, Hulyo 28. Sumala pa sa usa ka opisyal sa White House, nakapokus ang maong mga panagtigom sa nagpadayon nga mga panagbangi sa Ukraine ug sa Middle East, lakip ang mga lakang aron mapakunhod ang tensyon sa maong mga rehiyon.
Dugang pa niini, hisgutan nila Trump ug Netanyahu ang kahimtang sa panagbangi tali sa Israel ug Iran, ingon man ang dagan sa negosasyon sa Lebanon ug ang posibilidad sa pagpalapad sa Abraham Accords, usa ka kasabutan nga nagtumong sa pagpalig-on sa pormal nga relasyon tali sa Israel ug pipila ka mga nasud nga Arabo. Matud pa kang Trump, bisan adunay pipila ka kalainan sa ilang panan-aw ni Netanyahu kabahin sa Iran, nagpabilin nga nagkahiusa ang duha ka lider sa dagkong isyu sa seguridad sa rehiyon.
Samtang, sa iyang pakigpulong kang Zelensky, gilauman nga hisgutan ang nagpadayon nga peace process tali sa Russia ug Ukraine. Lakip sa gipadayag sa maong opisyal sa White House nga gitinguha sa Estados Unidos nga mapadali ang pagtapos sa gubat tali sa duha ka nasud pinaagi sa padayon nga diplomasya. Sa kasamtangan, gibalewala ni Trump ang alegasyon ni Zelensky nga ang Russia naghatag og intelligence information ngadto sa Iran kabahin sa mga military base sa Estados Unidos.
Sumala pa ni U.S Pres. Trump wala siya makakita og lig-ong basehan nga nagpakita nga ang Russia naghatag og maong impormasyon sa Iran, ilabina sa taas nga lebel. Kahinumduman, nagpadayon ang mga paningkamot sa Estados Unidos sa pagpasiugda sa diplomatikong mga panaghisgot aron mapakunhod ang tensyon sa Ukraine ug Middle East, nga sa pagkakaron nagpabiling sentro sa internasyonal nga kabalaka.
