Gipahayag sa Department of Energy (DOE) nga posible ang rollback o pagsaka sa presyo sa gasolina karong semanaha, samtang gilauman nga mosaka ang presyo sa diesel ug kerosene. Sumala pa sa DOE, base sa ilang gitakdang adjustment range, ang presyo sa gasolina mahimong moubos o mosaka og hangtod P1.00 matag litro.
Dugang pa niini, gilauman nga mosaka ang presyo sa diesel gikan P2.62 hangtod P4.62 matag litro, samtang ang kerosene posible usab nga mosaka og P2.22 hangtod P4.22 matag litro. Matud pa ni Energy Secretary Sharon Garin, nagpabiling dili lig-on ang presyo sa lana sa internasyonal nga merkado tungod sa nagkagrabeng tensyon sa Middle East, ilabina sa Strait of Hormuz, nga giila isip usa sa labing importante nga agianan sa mga oil tanker sa kalibotan.
Lakip sa mga hinungdan sa pagsaka sa presyo ang hulga sa seguridad sa paglabay sa mga barko sa maong ruta, nga nakahatag og kabalaka sa suplay sa krudo ug misangpot sa pagsaka sa presyo niini sa internasyonal nga merkado. Dugang pa ni Garin, kon magpadayon ang grabeng pag-usab-usab sa presyo sa lana sa umaabot nga semana, posible nga dili na magpagawas ang DOE og adjustment range, kondili magtakda na lamang kini og piho nga kantidad sa rollback o oil price hike.
Sa kasamtangan, padayon nga gimonitor sa DOE ang kahimtang sa merkado sa tibuok kalibotan aron matino ang sunod nga oil price adjustment nga ipatuman sa mga kompanya sa langis. Kahinumduman, ang mga paglihok sa presyo sa produktong petrolyo sa lokal nga merkado kasagarang naapektuhan sa kalihokan sa presyo sa krudo sa internasyonal nga merkado ug sa kahimtang sa suplay sa lana sa nagkalain-laing bahin sa kalibotan.
