Gipabakwit ang kapin 10,000 ka tawo gikan sa ilang mga balay ug camping site tungod sa paspas nga pagkaylap sa wildfire sa Lège-Cap-Ferret, France kaniadtong Hulyo 23, 2026, samtang ang grabeng kainit ug hulaw nakapasamot sa sunog sa nagkalain-laing bahin sa Europe.
Sumala sa mga opisyal, mikabat na sa 2,400 ektarya ang nasunog nga yuta sa kasadpang bahin sa Bordeaux, diin kapin 500 ka bombero ang miresponde aron mapugngan ang kalayo.
Ang wildfire nahitabo duol sa Arcachon Bay, usa ka sikat nga tourist area, diin daghan sa mga gipabakwit ang mga bisita nga nagpuyo sa mga camping site.
Gibutyag ni Lège-Cap-Ferret Mayor Philippe de Gonneville nga mas paspas mikuyanap ang kalayo kaysa sa ilang gilauman, hinungdan sa pagpabakwit sa liboan ka residente ug turista.
Nakasinati usab og dagkong sunog ang Spain, diin kapin 100,000 ektarya na ang nasunog karong tuiga, samtang daghang nasod sa Europe ang nag-atubang sa kakulang sa tubig tungod sa grabeng hulaw.
Sa Italy, nakabsan sa kinabuhi ang usa ka 59-anyos nga bombero atol sa iyang pagresponde sa wildfire sa Sicily.
Gipasidaan sa mga siyentista nga ang climate change nakapasamot sa grabeng kainit ug hulaw sa Europe, nga nagpauga sa mga tanom ug nagdugang sa peligro sa mga sunog.
