Gisugyot sa Department of Agriculture (DA) og P250 bilyon nga pondo alang sa tuig 2027 aron mapalig-on ang seguridad sa pagkaon, mapalambo ang panginabuhian sa mga mag-uuma ug mangingisda, ug mapalig-on ang ekonomiya sa nasod. Sumala pa ni Agriculture Secretary Francisco Tiu Laurel Jr., iyang gipadayag sa Food Security Forum sa Makati nga mikunhod ang kontribusyon sa sektor sa agrikultura sa gross domestic product o GDP gikan sa 19 porsyento niadtong 2005 ngadto sa 7.9 porsyento human sa duha ka dekada tungod sa dugay nang kakulang sa pagpamuhunan sa maong sektor.
Dugang pa niini, giingon sa kalihim nga mas dako ang gisugyot nga budget kumpara sa P215 bilyon nga pondo sa DA karong 2026 ug hapit na doble kumpara sa P117 bilyon niadtong 2022. Ilaang gamiton ang maong pondo alang sa farm mechanization, irigasyon, panukiduki, cold-chain facilities, digital infrastructure, ug post-harvest systems aron mapataas ang produksyon sa mga mag-uuma ug mapakunhod ang presyo sa mga pagkaon.
Lakip usab sa ipadayon nga programa ang P30 bilyong Rice Competitiveness Enhancement Fund, dugang pondo alang sa Philippine Crop Insurance Corporation, ug ang P20 bilyong tinuig nga pondo alang sa pagpalambo sa sektor sa kahayopan.
Gibutyag usab ni Laurel nga mitubo og 2.6 porsyento ang sektor sa agrikultura ug pangisdaan niadtong 2025, nga mao na ang pinakapaspas nga pagtubo niini sulod sa walo ka tuig, samtang mikunhod usab ang presyo sa bugas ug nihinay ang food inflation. Hinuon, giila sa kalihim nga nagpadayon gihapon ang dagkong hagit sa sektor sama sa kakulang sa irigasyon, taas nga gasto sa pagbiyahe ug pag-apod-apod sa produkto, ug epekto sa climate change.
Sa kasamtangan, gipasabot sa DA nga gikinahanglan ang padayon nga pagpamuhunan aron mapalig-on ang produksiyon sa pagkaon ug mapanalipdan ang panginabuhian sa mga mag-uuma ug mananagat sa nasod.
