Gikumpirma sa City Tourism Operations Office (CTOO) nga kapin sa ₱68 million ang gigahin sa lokal nga panggamhanan alang sa pagsaulog sa Kadayawan Festival 2026.
Matud ni CTOO Head Willenito Tormis Jr., misaka ang pondo karong tuiga tungod sa pagdugang sa mga kalihokan ug kompetisyon nga kabahin sa kasaulogan.
Gilauman usab sa lokal nga panggamhanan nga moabot sa 250,000 ang tourist arrivals atol sa tibuok nga selebrasyon.
Ipahigayon ang Kadayawan Festival 2026 gikan Agosto 7 hangtod Agosto 18, diin ang Grand Weekend mahitabo sa Agosto 14 hangtod Agosto 16.
Ang Kadayawan maoy kinadak-ang kasaulogan sa Davao City nga gipahigayon matag Agosto isip pasalamat sa abundang ani ug pagpasidungog sa 11 ka tribong lumad sa dakbayan.
Lakip sa mga nag-unang kalihokan ang Hiyas sa Kadayawan, Kadayawan Village, Indak-Indak sa Kadayawan ug Pamulak sa Kadayawan nga ipahigayon sa Grand Weekend, diin gilauman ang pinakadaghang mga bisita ug mga partisipante.
