Miabot sa 526 ka overseas Filipino workers (OFWs) gikan sa Davao Region ang natabangan sa Overseas Workers Welfare Administration (OWWA) Regional Welfare Office XI human sa nagpadayon nga kagubot sa Middle East. Sumala pa ni OWWA XI Regional Director Mohammad I. Victor, 26 sa mga OFWs ang direktang gitabangan sa ilang pag-abot sa Davao City, samtang ang ubang repatriated workers nakadawat usab og suporta sa Manila.
Gibutyag usab ni Victor nga milapas na sa 10,000 ang kinatibuk-ang ihap sa mga repatriated OFWs sa tibuok nasod tungod sa krisis sa Middle East. Dugang pa niini, giingon sa opisyal nga gawas sa dinaliang ayuda, mahimo usab ma-avail sa mga OFWs ang reintegration ug livelihood assistance aron matabangan sila nga makasugod pag-usab sa ilang panginabuhi.
Padayon usab ang OWWA sa paghatag og scholarship programs alang sa mga anak sa OFWs isip kabahin sa suporta sa ahensya ngadto sa mga miyembro niini ug ilang mga pamilya.
