Nasakmit sa Community Environment and Natural Resources Office (CENRO)-Davao City ang mga walay dokumentong forest products nga gibaligya pinaagi sa online marketplace atol sa operasyon nga gihimo sa Lower Tamugan, Barangay Tamugan, Davao City.
Gilusad ang operasyon human sa padayon nga monitoring sa Facebook Marketplace, uban sa suporta sa Philippine National Police (PNP) Maritime Group.Lakip sa mga nakumpiska ang 240 kabuok sa nagkalain-laing klase sa kahoy, sama sa Falcata, Mahogany, Narra, ug uban pa, nga adunay kinatibuk-ang 2,198.66 board feet ug gibanabanang kantidad nga ₱82,133.89.
Nakuha usab sa mga awtoridad ang usa ka bandsaw nga gibanabanang nagkantidad og ₱50,000.Sumala sa CENRO-Davao City, walay legal nga mga dokumento ang mga kahoy, maong ginatino pa ang gigikanan niini. Expired na usab ang permit sa establisimyento sukad pa kaniadtong 2024,apan nagpadayon gihapon kini sa pagbaligya sa mga kahoy pinaagi sa mga marketplace ilabi na online.
Gi-awhag sa Department of Environment and Natural Resources Regional Office XI (DENR XI) ang publiko nga suportahan ang kampanya batok sa ilegal nga pagputol, pagbaligya, ug pagbiyahe sa mga forest products.Gipahibalo usab sa DENR XI nga gisugdan na ang angayng administratibo ug kriminal nga mga kaso batok sa mga responsable.
