Nagpasidaan ang World Health Organization (WHO) kaniadtong Huwebes, Hulyo 17, 2026 nga mas paspas ang pagkaylap sa Ebola virus sa Democratic Republic of Congo kumpara sa bisan unsang miaging outbreak sa maong makamatay nga sakit.
Sumala ni WHO Director-General Tedros Adhanom Ghebreyesus, milapas na sa 2,000 ang natala nga kaso sa Ebola sa nasud, lakip ang 796 ka namatay, duha ka bulan human ideklarar ang outbreak.
Tungod niini, gikonsiderar na kini karon isip ikatulong pinakadako nga Ebola outbreak nga natala sa kasaysayan.
Matod ni Tedros, mas kusog ang pagkaylap sa kasamtangang outbreak kaysa sa Ebola outbreak sa DR Congo kaniadtong tuig 2018 hangtod 2020, diin kapin 10 ka bulan pa ang milabay una nakaabot sa 2,000 ka kumpirmadong kaso.
Kahinomduman nga ang ika-17 Ebola outbreak sa DR Congo gideklarar kaniadtong Mayo 15 ning tuiga human adunay daghang namatay sa Ituri Province, usa ka lugar sa amihanan-sidlakang bahin sa nasud nga nagpadayon usab ang kagubot tungod sa presensya sa mga armadong grupo.
Nalisdan usab ang mga awtoridad sa pagresponde sa outbreak tungod sa nagpadayon nga armadong panagbangi sa pipila ka mga lugar sa DR Congo. Bag-ohay lang usab giatake ang usa ka Ebola treatment center sa Bunia.
Sa pagkakaron, naabot na ang mga kaso sa Ebola sa lima ka mga lalawigan sa Congo ug nakaabot usab sa silingang nasud nga Uganda.
Ang kasamtangang outbreak gipahinabo sa talagsaong Bundibugyo strain sa Ebola virus, nga sa pagkakaron wala pa’y aprubadong bakuna o tambal.
