Nanawagan si Rep. Paolo “Pulong” Duterte, Davao City First District, sa publiko nga hatagan og higayon ang impeachment court sa Senado sa pagbuhat sa iyang katungdanan ug pasagdan nga matuman ang proseso sa hustisya sa impeachment trial ni Sara Duterte.Sumala pa kang Duterte, naglaom siya nga ang pagdungog sa impeachment trial ipahigayon sa patas, propesyonal ug hapsay nga paagi, nga walay dili angay nga pagpanghilabot o mga kalihokan nga makasamok sa proseso.
Dugang pa niini, gipasiugda niya nga panahon na aron mogawas ang kamatuoran taliwala sa nagkatapok nga mga alegasyon, espekulasyon, politikal nga mga naratibo ug nagkalainlaing mga isyu nga naglibot sa maong kontrobersiya sulod sa milabay’ng mga bulan.
Lakip sa iyang gipahayag, giingon ni Duterte nga ang katawhang Pilipino angayan makabaton sa tinuod nga mga kamatuoran ug lig-on nga ebidensya, dili mga hungihong, insinuasyon o propaganda.Matud pa usab kaniya, andam si Vice President Sara Duterte nga moatubang ug motubag sa tanang alegasyon batok kaniya pinaagi sa hustong legal nga proseso ug sa tukmang forum, diin aniya adunay kahigayonan nga mapaminaw ang iyang depensa.
Sa kasamtangan, gi-awhag ni Duterte ang publiko nga magpabiling bukas ang panghunahuna ug tugotan ang Senado isip impeachment court nga maghimo sa ilang konstitusyonal nga katungdanan. Kahinumduman, gipadayag usab ni Duterte nga bisan pa og ang mga politikal nga pag-atake makahimo og dagkong ulohan sa balita, ang kamatuoran lamang ang makabarog kon susihon pinaagi sa ebidensya. Naglaom usab siya nga ang maong impeachment trial dili lamang makatubag sa mga alegasyon, kondili makapadayag usab sa tinuod nga motibo sa mga reklamo batok sa Bise Presidente.
