Misalmot ang nagkadaiyang ahensya sa gobyerno, lakip ang mga pipila usab ka mga pribadong kompanya, ingon man ang nagkadaiyang mga tulunghaan sa syudad sa Davao sa gipahigayon nga Nationwide Simultaneous Earthquake Drill (NSED) karong adlawa, pasado alas 9:00 sa buntag, Hunyo 18 aron mapalambo ang kahandam sa publiko batok sa posibleng linog ug uban pang mga kalamidad.
Lakip sa mga nisalmot sa maong kalihokan ang Department of Social Welfare and Development (DSWD) Region XI, Bureau of Fire Protection (BFP) Region XI, Police Regional Office (PRO) XI, National Housing Authority (NHA) Region XI, Coast Guard District Southern Mindanao, ug ang Local Government Unit (LGU) sa Davao City, uban sa daghang pang ahensya sa gobyerno ug pribadong institusyon.
Atol sa earthquake drill, gipatuman sa mga partisipante ang “Duck, Cover and Hold” nga pamaagi isip unang tubag kon adunay kusog nga linog.
Gisundan kini sa organisadong evacuation drill diin ang mga empleyado, estudyante ug mga bisita maampingong gipagawas ngadto sa mga gitakdang evacuation areas.
Sumala sa mga otoridad, ang regular nga pagpahigayon sa mga earthquake drill importante aron masulayan ang kahandam sa matag opisina ug institusyon ug aron masiguro nga nahibal-an sa publiko ang hustong mga lakang nga buhaton panahon sa emerhensya.
Padayon usab nga giawhag ang mga Dabawenyo nga magpabiling alerto ug aktibong motambong sa mga disaster preparedness activities aron mas andam sa bisan unsang emerhensyang mahimong mahitabo sa umaabot.
