Ginumpirma sa Commission on Appointments (CA) ang promosyon sa lima ka mga tag-as nga opisyal sa Armed Forces of the Philippines (AFP), kapin duha ka semana human malangan gumikan sa kakulangon og ihap sa mga senador nga miyembro sa komisyon.
Sa gipahigayong pagdungog, giaprubahan sa CA ang mga appointment nila Lieutenant General Edmundo G. Peralta, Vice Admiral Allan M. Javier, Major General Isagani O. Criste, Brigadier General Niceforo M. Diaz Jr., ug Brigadier General Rosemawatte A. Remo.
Kahinumduman nga nalangan ang kumpirmasyon sa nahisgutang mga opisyal niadtong Hunyo 1 human wala mamugna ang gikinahanglan nga ihap sa mga senador nga magsilbing representante sa Commission on Appointments.
Nauna niini, sa gipahigayong special session sa Senado ilalom sa bag-ong pagdumala ni Senate President Sherwin Gatchalian, natuboy ang mga senador nga mamahimong representante sa kapulungan sa CA, hinungdan aron mapadayon ang mga nalangan nga kumpirmasyon.
Kalakip sa mga bag-ong miyembro sa Commission on Appointments gikan sa Senado sila Senate President Pro Tempore Vicente “Tito” Sotto III, Majority Leader Juan Miguel “Migz” Zubiri, at mga senador na sina Joel Villanueva, Risa Hontiveros, Raffy Tulfo, ug JV Ejercito gikan sa majority bloc.
Lakip usab sa komisyon ang mga senador gikan sa minority bloc nga sila Loren Legarda, Rodante Marcoleta, Imee Marcos, Bong Go, Jinggoy Estrada, ug Mark Villar.
Gawas sa promosyon sa lima ka mga heneral sa AFP, giaprubahan usab sa CA ang tulo ka lain pang nominasyon ug 83 ad interim appointments sa mga opisyal sa Department of Foreign Affairs (DFA) nga kalakip sa Philippine Foreign Service.
