Kadaghanan sa mga Pilipino ang mosuporta sa pagpahigayon og hiniusang military exercises sa West Philippine Sea, sumala sa usa ka survey nga gihimo sa OCTA Research Group.
Sa survey nga gipahigayon niadtong Marso 19 hangtod 25 ug gi-komisyon sa Armed Forces of the Philippines (AFP), napadayag nga 71 porsyento sa mga respondents ang nagtuo nga ang hiniusang military exercises o patrols sa West Philippine Sea adunay positibong epekto sa nasud.
Samtang, 14 porsyento lamang ang miingon nga makadaot kini, ug pito ka porsyento ang nag-ingon nga walay epekto.
Matud sa OCTA, ang maong resulta adunay dakong kahulogan alang sa polisiya sa depensa sa Pilipinas ug sa paagi sa paghatag og impormasyon ngadto sa publiko.
Dugang pa niini, gipakita sa datos nga daghang Pilipino ang nagtan-aw sa maong mga kalihokan isip usa ka paagi aron mapalig-on ang kalinaw ug kalig-on sa rehiyon, nga mahimong konsiderahon sa mga magbubuhat og polisiya sa pag-evaluate sa kasamtangang mga kasabutan sa depensa.
Gipunting usab sa OCTA nga adunay kalainan sa opinyon sa publiko base sa lokasyon ug kahimtang sa ekonomiya, nga posibleng bunga sa kasinatian sa kasaysayan, kaduol sa mga lugar nga adunay tensyon, o kalahi-lahi sa lebel sa kahibalo bahin sa katuyoan ug kinaiya sa maong mga kalihokan.
Tungod niini, giingon sa OCTA nga adunay panginahanglan sa mas inklusibo ug mas sensitibo sa rehiyon nga mga kampanya sa pagpahibalo sa publiko.
Gipagawas ang resulta sa survey base sa hangyo sa AFP, sumala sa OCTA.
Ang survey adunay 1,200 ka respondents ug adunay margin of error nga plus/minus tulo ka porsyento.
