Misaka na sa 45 ang gidaghanon sa mga nakabsan sa kinabuhi tungod sa magnitude 7.8 nga linog nga miigo sa mga bahin sa habagatang Mindanao niadtong Lunes, samtang 487 ang naangol ug 17 pa ka mga tawo ang padayon nga gipangita, sumala sa mga otoridad.
Subay sa labing bag-ong situational report sa National Disaster Risk Reduction and Management Council o NDRRMC nga gipagawas alas-9:00 kaganihang buntag, 33 sa mga nakabsan sa kinabuhi gikan sa rehiyon sa SOCCSKSARGEN o Region 12 ug ang 12 gikan sa Davao Region o Region 11.
Ang maong mga numero nagpabiling ubos sa validation hangtod sa Martes sa gabii.
Sa kinatibuk-an, 33,596 ka mga pamilya o 149,372 ka mga indibidwal ang naapektuhan sa linog sa tibuok Mindanao ug kasikbit nga mga lugar.
Dul-an 3,000 ka mga balay ang nadaot, samtang liboan ka mga residente ang nagpabilin sa mga evacuation center samtang nagpadayon ang search, rescue ug relief operations.
