Gisuspinde sa Executive Bureau sa International Criminal Court (ICC) si Chief Prosecutor Karim Khan tungod sa mga alegasyon sa sexual misconduct o giingong sekswal nga pag-abuso.
Sumala pa, ang 21-member Bureau sa Assembly of States Parties (ASP) nga maoy nagdumala sa ICC mihimo sa desisyon pinaagi sa qualified majority nga suspindihon si Khan samtang nagpadayon pa ang pinal nga desisyon sa maong buhatan isip competent decision-maker. Gibutyag usab sa Bureau nga ang suspensiyon wala nagpasabot nga pinal na ang resulta sa imbestigasyon.
Matud pa, giakusahan si Khan og giingong indecent behaviour batok sa usa ka babaye nga empleyado nga iyang nasakop sa trabaho. Nagsugod ang isyu niadtong unang bahin sa 2024, diin giingong gi-harass ug gipugos siya sa pipila ka dili angay nga buhat.
Sa wala pa ang opisyal nga suspensiyon niadtong Hunyo 2026, boluntaryo nang ni-leave of absence si Khan niadtong Mayo 2025 aron hatagan og dalan ang imbestigasyon, samtang balik-balik niya usab nga gipanghimakak ang mga alegasyon batok kaniya.
Lakip sa iyang mga nahimong kaso, giatubang niya ang mga high-profile investigations sama sa warrant batok kang Russian President Vladimir Putin ug Israeli Prime Minister Benjamin Netanyahu, ug ang imbestigasyon batok sa kanhi Pangulo sa Pilipinas nga si Rodrigo Duterte.
Sa pagkakaron, tungod sa maong suspensiyon, diskwalipikado na si Khan sa pagdumala sa kaso batok sa kanhi Philippine president.
