Nag-atubang karon og hagit ang mga opisyal sa dakbayan tali sa kalahi-an sa polisiya sa gobyerno ug sa aktuwal nga kahimtang sa merkado.Kini human sa pipila ka lamang ka oras human ipatuman sa gobyerno ang nasudnong price ceiling nga P50 kada kilo sa imported nga bugas, nakasugat dayon og hagit ang mga awtoridad sa Davao. Gipangunahan sa Department of Agriculture sa Davao Region ang inspeksyon sa Bankerohan Public Market aron ipatuman ang Executive Order No. 118 nga nagtakda og temporaryong presyo nga dili molapas sa P50 kada kilo alang sa imported regular ug well-milled rice.
Sa unang inspeksyon, nasuta nga adunay nagkalainlaing lebel sa pagsunod sa mga negosyante. Adunay mga tindero nga nagpahiangay na sa presyo ngadto sa P49 hangtod P50 matag kilo, apan adunay uban nga nagpadayon sa pagbaligya nga mas mahal sa gitakdang presyo, nga misobra og P2 ngadto sa P3 matag kilo. Matud sa pipila ka vendors, mahal pa ang ilang pagpalit sa bugas ug gamay na lamang ang ilang ginansya, maong lisod alang kanila ang dayong pagpaubos sa presyo nga walay masinati nga kapildihan.
Sumala ni Director.Macario Gonzaga, ang problema dili lamang anaa sa mga merkado kondili posible usab nga naggikan sa mas taas nga bahin sa supply chain nga kini ang padayon nga ginasubay karong panahuna. Gitambongan usab sa operasyon ang mga kawani gikan sa Department of Trade and Industry, Philippine National Police, ug Bureau of Plant Industry, isip kabahin sa koordinadong aksyon sa gobyerno aron masiguro ang pagsunod sa balaod.
Aron mapugngan ang posible nga pagbalik sa mas taas nga presyo human sa inspeksyon, gipahibalo ni Gonzaga nga magpatuman sila og adlaw-adlaw ug kalit-kalit nga inspeksyon. Ang mga negosyanteng makalapas sa price ceiling mahimong hatagan og notice ug pangayuan og katin-awan kabahin sa ilang pricing practices.
