Gilauman nga mahimong sentro sa agenda ang mga isyu sa enerhiya ug depensa sa pagbiyahe ni Pang. Ferdinand Marcos Jr. ngadto sa Japan uban sa first lady nga si Liza Araneta-Marcos gikan Mayo 26 hangtod Mayo 29 alang sa unang state visit sulod sa 11 ka tuig isip pagtimaan sa ika-70 nga anibersaryo sa diplomatikong relasyon sa duha ka nasod.
Gikatakdang modawat kang Pang. Marcos ug sa iyang asawa sila Emperor Naruhito ug Empress Masako sa Kōkyo o Imperial Residence sa dili pa hatagan ang Presidente sa Grand Cordon of the Supreme Order of the Chrysanthemum, sumala kang Chief Cabinet Secretary nga si Minoru Kihara.
Matud pa ni Kihara, hatagan usab ang first lady sa Grand Cordon of the Order of the Precious Crown, nga sundan dayon sa usa ka state banquet. Ang magtiayon nga Marcos mahimong unang state visitors sa Japan sukad sa pagbisita ni Luiz Inacio Lula da Silva niadtong Marso 2025.
Gilauman usab nga adunay bilateral meeting sa Martes tali ni Pang.Marcos ug ni PM Sanae Takaichi aron palig-onon ang relasyon ngadto sa usa ka “comprehensive strategic partnership” ug hisgutan ang mga isyu sa depensa ug enerhiya.
Gilauman nga magpunting ang depensa nga pakighinabi sa Philippines-Japan Reciprocal Access Agreement (RAA) nga gipirmahan niadtong 2024 ug sa Acquisition and Cross-Servicing Agreement (ACSA) nga gipirmahan niadtong Enero.
Ang RAA nagtugot sa mas sayon nga pagdeploy sa mga pwersa sa Japan ug Pilipinas sa teritoryo sa usag usa alang sa joint exercises, combat training, ug disaster response.
Samtang ang ACSA nagtugot sa walay buhis nga paghatag og suplay ug serbisyo sama sa gasolina, bala, pagkaon, ug medical care tali sa Armed Forces of the Philippines ug Japan Self-Defense Forces panahon sa joint operations, humanitarian missions, ug peacekeeping activities.
Kon ang RAA nagtugot sa pisikal nga presensya sa mga sundalo, ang ACSA maoy maghatag sa materyales ug logistical support nga gikinahanglan aron mapadayon ang joint operations.
Gilauman usab nga hisgutan sa maong pakighinabi ang interes sa Pilipinas sa pagpalit og Type 88 surface-to-ship missiles, usa ka land-based antiship weapon nga adunay range nga kapin sa 100 kilometro ug gigamit karon sa Japan Ground Self-Defense Forces.
Nakadani og internasyonal nga atensyon ang missile system human kini gisulayan sa Japan atol sa Exercise Balikatan 2026. Mao kini ang unang higayon sukad 1945 nga mipabuto ang Japan og ground-based antiship missile.
Gilauman usab nga hisgutan sa pagbisita sa Presidente ang energy security pinaagi sa Partnership on Wide Energy and Resources Resilience Asia program sa Japan, usa ka $10 bilyon nga inisyatiba nga gilunsad ni Prime Minister Takaichi niadtong Abril 15.
Ang maong $10 bilyon nga commitment ipatuman pinaagi sa Japan Bank for International Cooperation ug Nippon Export and Investment Insurance aron suportahan ang infrastructure ug industrial efficiency.
