Miabot na sa gibanabanaang $29 billion kon 1.7 trillion pesos ang nagasto sa United States sa nagpadayon nga giyera niini batok sa Iran, sumala sa usa ka taas nga opisyal sa Pentagon adlaw nga Martes oras sa Amerika.
Mas taas kini og $4 billion kung itandi sa unang pagbana-bana sa nasod niaging bulan nga nagkantidad lamang og $25 billion.
Lakip sa bag-ong kantidad ang dugang nga gasto sa pag-ayo ug pag-ilis sa mga kagamitan, ingon man ang operational costs sa militar.
Wala gilayon gipaklaro sa Pentagon kung unsa ang eksaktong pagkalkula sa kinatibuk-ang $29 billion nga kantidad.
Una nang gitaho sa Reuters niadtong Marso nga mikabat na sa labing menos $11.3 billion ang nagasto sa Amerika sulod sa unang unom ka adlaw sa panagbangi nga gipangulohan ni US Pres.Donald Trump.
