Nakatakdang moabot sa Pilipinas ang 21,000 metriko tonelada sa liquefied petroleum gas (LPG) nga napalit gikan sa Estados Unidos karong Mayo.
Kabahin kini sa paningkamot sa gobyerno aron masiguro ang lig-on ug kasaligan nga suplay sa lana taliwala sa krisis sa Tungang Sidlakan, diin nagagikan ang crude oil nga ginaproseso aron makahimo og LPG ug uban pang fuel.
Sa usa ka pahayag karong adlawa, gipahibalo sa Department of Energy (DOE) nga gilauman nga ma-deliver kini sa nasud tali sa Mayo 20 hangtod 31 ug dad-on sa Batangas.
Gilauman usab nga makatabang ang maabot nga shipment sa pagpalig-on sa imbentaryo sa LPG sa nasud ug makadugang sa supply buffers alang sa mga panimalay ug negosyo.
Sumala sa Energy Department, padayon ang ilang pakiglambigit sa gobyerno ug mga stakeholders sa industriya aron masiguro ang energy security ug mapadayon ang lig-on nga suplay, ug maprotektahan ang gikinahanglan sa mga Pilipino nga nagsalig sa LPG sa ilahang adlaw-adlaw nga panginahanglan.
