Gipangusgan ni kanhi House Speaker Martin Romualdez ug sa Tingog Party-list ang pagduso sa “Oral Healthcare Act” sa Kamara aron mapalapdan ang access sa dental services sa nasud.
Sumala sa mga nagpaluyo sa maong suhestiyon, tumong niini nga mapalambo ang dental care system ilabi na alang sa naglisod ug underserved nga sektor sa katilingban nga kasagarang walay igong access sa maong serbisyo.“Layunin ng panukalang ito na gawing abot-kaya, accessible at komprehensibo ang serbisyong dental sa bansa,” dugang pagpasabot ni Romualdez.
Lakip sa gilauman sa maong balaod ang pagpalig-on sa preventive oral healthcare, sama sa regular check-ups, libreng konsultasyon, ug edukasyon kabahin sa hustong pag-atiman sa ngipon.Dugang pa niini, gitan-aw usab sa panukala ang paghatag og dugang pondo ug suporta sa mga public health facilities aron mapalapad ang ilang kapasidad sa paghatag og dental services sa publiko.
Sa kasamtangan, gilauman sa mga health advocates nga pinaagi niini, moubos ang kaso sa dental problems sa nasud nga kasagarang ginabalewala apan adunay dakong epekto sa kinatibuk-ang kahimsog sa usa ka indibidwal.
Sa pagkakaron, padayon pa ang deliberasyon sa Kamara sa maong panukala, samtang naglaum ang mga nagpaluyo nga madali kini og aprobahan aron mas maprotektahan ang oral health sa mga Pilipino.
