Nagsugod na karong adlawa ang pagsaka sa presyo sa matag tangke sa liquefied petroleum gas (LPG).
Sumala kang LPG Marketers’ Association (LPGMA) President Arnel Ty, gihimo nila nga duha ka tranche ang pagsaka nga P10 matag kilo sa LPG aron dili mabug-atan ang mga konsumidor.
Ang unang P5 nga pagsaka sa matag kilo sa LPG magsugod karong Abril 1, diin adunay dugang nga P55 sa matag 11 kg nga regular household LPG cylinder.
Pag-abot sa Abril 7, adunay ikaduhang pagsaka usab ngadto sa P5 kon P55 sa matag 11 kg nga tangke sa LPG.
Gibutyag nga ang maong pagsaka sa presyo gi-aprobahan usab sa Department of Energy (DOE), lakip na ang pagtagi-tagi sa pagtaas aron dili makalitan ang mga konsumidor.
Dugang pa niini, ang Pilipinas nagkuha og LPG gikan sa South Korea ug Japan, diin aduna sila’y emergency reserves nga makalahutay og hangtod 250 ka adlaw.
Sa pagkakaron, moabot pa sa 40 ka adlaw ang stock sa LPG sa nasud.
