Balhog sa selda sa kapulisan human nga nadakpan ang usa ka lalaki nga si alyas “Mel,” 52 anyos, minyo nga residente sa Purok 1 Sampaguita, Barangay Tibanban, Governor Generoso, Davao Oriental, tungod sa paglapas sa RA 9165.
Nahitabo ang operasyon pasado alas 12:00 sa kadlawon kagahapong adlawa(Hwebes) sa Purok 3, Barangay Lavigan, Governor Generoso, Davao Oriental, nga gihimo sa hiniusang pwersa sa PDEU-DOPPO, PIU-DOPPO, ug DEU sa Governor Generoso MPS kauban ang koordinasyon sa PDEA.
Sumala sa kapulisan, usa ka police operative ang nagpakaron ingon poseur buyer ug nakapalit og usa ka sachet sa gituohang shabu gamit ang markadong ₱1,000, nga misangpot sa gilayong pagkasikop sa suspetsado.
Atol sa operasyon, narekober gikan sa suspek ang tulo ka pakete sa iligal nga droga kon shabu nga adunay gibug-aton nga 5 grams, nga adunay street value nga mokabat sa ₱31,500.
Nakumpiska usab ang usa ka armas nga Taurus .45 caliber pistol ug 9 ka live ammunition lakip ang magazine sa .45 pistol.
Nakumpiska usab ang Android cellphone, itom nga pitaka, driver’s license holder, ug usa ka itom nga sling bag.
Sa pagkakaron, ang suspek anaa na sa kostudiya sa kapulisan samtang nagpaabot na lamang sa kamanduan sa korte human nga gipasakahan og kaso.
