Opisyal na nga gimugna ang Coast Guard District Southeastern Mindanao (CGDSEM) ang duha ka bulag nga bahin sa imbestigasyon aron susihon ang pagkaunlod sa MBCA Amejara, nga nagpunting sa mga safety protocol ug sa posibleng kriminal nga responsibilidad.
Gipadayag ni CGDSEM commander Commodore Philipps Soria kagahapong adlawa nga napirmahan na ang mga kamanduan sukad pa Enero 20, 2026, aron masiguro ang komprehensibong pagsusi sa maong trahedya sa dagat.
Ang imbestigasyon gibahin sa duha ka espesyal nga team aron masakop ang tanang legal ug safety nga aspeto: Marine Casualty Investigation (MCI) Team nga usa ka lima ka miyembro nga panel nga nagtutok sa pag-ila sa responsibilidad (liability attribution) ug sa paghatag og rekomendasyon sa kaluwasan.
Tumong niini nga mahibal-an ang tinuod nga hinungdan sa aksidente aron malikayan ang susamang insidente sa umaabot nga panahon.
Incident Investigation Team (IIT), kini ang usa ka pito ka miyembro nga grupo nga naglakip og mga eksperto sa balaod ug mga espesyal nga yunit.
Ang ilang tahas mao ang pagtino sa administratibo ug kriminal nga responsibilidad sa tag-iya, operator, ug crew sa sakayan. Ang imbestigasyon nagtutok sa rason nganong ang barko naa sa lugar nga gawas sa awtorisado nga hurisdiksyon niini.
Nakumpirma sa imbestigasyon nga ang MBCA Amejara rehistrado lamang isip pang-adlaw (daytime) nga passenger motorbanca alang sa turismo, ug ang prangkisa niini limitado lamang sa ruta tali sa Davao City ug sa Island Garden City of Samal (IGACOS).
Gikabutyag nga naunlod ang sakayan sa lugar nga layo kaayo sa gitugotan nga bahin sa kadagatan ug nahitabo kini sa gabii. Samtang tungod niini, gibutyag sa opisyal nga adunay Walo ka mga personahe ang girelieve sa pwesto.
Subay sa resulta sa imbestigasyon, walo ka mga Coast Guard personnel ang gikuhaan og katungdanan. Gipadayag ni Soria nga bisan pa nga nangayo og permiso sa paglawig ang crew sa MBCA Amejara, midumili ang mga opisyal sa Coast Guard sa pagpirma sa mga permit tungod sa mga kalahi-an sa ruta ug uban pang kakulangan sa dokumento.
Bisan walay opisyal nga pirma ug clearance, nakalawig gihapon ang sakayan gikan sa pantalan.
