Gipamatud-an sa kapulisan sa Mawab, Davao de Oro nga dili tulis ang motibo sa pagpamusil nga misangpot sa kamatayon sa usa ka truck helper atol sa insidente sa National Highway sa Barangay Tuboran, Mawab, niadtong Martes sa gabii.
Sumala kang PMaj. June Eric B. Deguito, hepe sa Mawab Municipal Police Station, klaro sa ilang inisyal nga imbestigasyon nga walay bisan unsang personal nga butang, kargamento, o kuwarta nga nakuha gikan sa biktima, hinungdan nga dili ikaklasipikar ang insidente isip robbery o holdap.
Ang biktima giila nga si Novem A. Villesas, residente sa Kinamayan, Santo Tomas, Davao del Norte, nga kauban sa usa ka Isuzu Forward truck nga gikan sa Trento, Agusan del Sur. Ang maong sakyanan nagkarga og mga tangke sa oxygen ug acetylene dihang gi-ambush sa mga wala mailhing armadong lalaki nga sakay og motorsiklo.
Matod sa pulisya, kalit lamang gipara ang truck sa highway ug didto na nahitabo ang pagpamusil nga miresulta sa pagkamatay sa helper. Wala usab gipakita nga may paningkamot ang mga suspek sa pagpangawat, nga nagpalig-on sa teorya nga lahi ang tinuod nga motibo sa krimen.
Padayon karon ang lawom nga imbestigasyon sa kapulisan aron mailhan ang mga responsable sa pag-atake ug masuta kung personal ba, trabaho-related, o laing anggulo ang hinungdan sa pagpamusil. Giawhag usab sa otoridad ang publiko nga motabang pinaagi sa paghatag og impormasyon nga makatabang sa pagdakop sa mga suspek.
