Mitungha ang tabang sa edukasyon ngadto sa kabukiran sa Marilog District human hatagan og school bags ug kompletong school supplies ang tanang tinun-an sa Columbus Elementary School sa Barangay Buda niadtong Enero 22, 2026.
Kapin sa 535 ka mga estudyante gikan Kindergarten hangtod Grade 6 ang nakabenepisyo sa programa nga gipangulohan sa City Government of Davao sa pakigtambayayong sa Chinese Consulate General. Tumong sa inisyatibo nga masiguro nga walay batang mapabilin sa eskwelahan tungod lamang sa kakulang sa mga batakang gamit sa pagkat-on, ilabi na sa mga eskwelahan nga anaa sa layo nga lugar.
Personal nga gipangunahan ni Vice Mayor Rodrigo “Rigo” Duterte II ang pag apod-apod sa mga bag, kauban si Chinese Consul General Zhao Xiuzhen, City Councilor Atty. Petite Principe, ug Schools Division Superintendent Reynante Solitario. Ang ilang presensya nagpamatuod sa panaghiusa sa lokal nga pangagamhanan ug international partners sa pagpalig-on sa sektor sa edukasyon.
Gipasiugda ni Vice Mayor Duterte nga ang maong tabang labaw pa sa materyal nga donasyon, kundili usa ka pahayag nga ginahatagan og bili sa syudad ang edukasyon sa kabataan bisan pa man sa ilang kahimtang ug lokasyon. Iyang gidasig ang mga estudyante nga seryosohon ang pag-eskwela isip paagi sa paglambo sa kaugalingon ug pagpasalamat sa sakripisyo sa ilang mga ginikanan.
Sa bahin sa eskwelahan, gipahayag ni Principal Sherwin C. Ybañez ang dakong pasalamat sa kahigayunan nga matag estudyante nakadawat og kaugalingong bag ug school supplies. Matod niya, dako ang epekto niini sa moral ug kadasig sa mga bata, ilabi na nga kadaghanan kanila naggikan sa mga pamilyang nag-atubang og pinansyal nga hagit.
Gipasabot usab nga ang programa nakapamenos sa palas-anon sa mga ginikanan ug nakahatag og dugang kadasig sa mga bata aron ipadayon ang ilang mga damgo bisan unsa pa ang kalisdanan nga ilang masugatan.
Padayon nga gipamatud-an sa City Government of Davao ang ilang baruganan nga unahon ang edukasyon pinaagi sa mga programa nga dili lang limitado sa pagapod-apod og gamit sa eskwelahan, kundili lakip usab ang dugang suporta alang sa child welfare ug kalidad nga edukasyon, ilabi na sa mga komunidad nga lisod maabot.
