Nagpahimangno ang Department of Health (DOH) Davao sa publiko batok sa mga tawo nga nagpaila nga sila ang Regional Director aron mangayo og kwarta, donasyon, o personal nga impormasyon.
Giklaro sa opisina nga ang tinuod nga Regional Director sa DOH Davao wala magapangayo og pondo, gift cards, o bank transfers pinaagi sa personal calls, texts, o bisan unsang mensahe sa social media. Ang tanan nga transaksyon sa opisina ginahimo lamang pinaagi sa formal ug dokumentadong pamaagi sulod mismo sa opisina.
Giingon usab sa DOH Davao nga ang mga hangyo alang sa emergency services o donations sa cash nga gikan sa dili opisyal nga tawo, klaro nga pagpangilad ug ang publiko angay magbantay.
Ang bisan kinsa nga nakahibalo o nakasinati sa susamang pagpangilad gitambagan nga ireport dayon sa email rd@ro11.doh.gov.ph
o sa telepono (082) 227 2463 local 1119 aron masulbad ug matabangan ang imbestigasyon sa DOH.
Gipahimangno sa buhatan nga mag-amping ug magpabilin nga alerto ang publiko, ilabi na sa mga tawag o mensahe nga nangayo og personal o pinansyal nga impormasyon, aron malikayan ang pagkatiktik sa scammers ug maprotektahan ang seguridad sa komunidad.
