Gipaigmat sa Davao City Health Office (CHO) ang katawhan batok sa hulga sa pekeng mga tambal nga nagkalat sa merkado, ilabi na sa online platforms ug sa mga dili awtorisadong botika ug tindahan. Sumala sa ahensya, dakong risgo sa panglawas ang paggamit sa mga peke nga medisina tungod kay wala kini garantiya sa kalidad ug ka-epektibo.
Gipasabot sa CHO nga ang pagpalit lamang sa tambal nga gireseta sa doktor ug gikan sa lehitimong botika maoy labing luwas nga paagi aron malikayan ang pagkabiktima. Matod pa nila, kasagaran sa peke nga tambal walay tinud-anay nga bisa ug posibleng makahatag pa og daotang epekto sa lawas.
Gipahinumdoman usab ang publiko nga magmatngon sa pagtan-aw sa pakete sa tambal, lakip na ang sayop sa spelling sa label, kalainan sa disenyo, porma, kadak-on, baho, ug lasa nga dili kasagaran. Ang bisan unsang kausaban sa dagway sa tambal ikonsiderar dayon nga pasidaan.
Dugang pa, gikinahanglan nga susihon kon adunay klaro nga FDA batch ug lot number, manufacturing date, ug expiration date ang tambal. Kung adunay pagduhaduha, gidasig sa CHO ang katawhan nga mokonsulta dayon sa health professionals o motawag sa mga awtoridad aron mareport ang kahina-hinalang produkto.
Sa kinatibukan, gi-awhag sa Davao CHO ang komunidad nga magpabiling maalam ug mapanukiduki sa tanang butang nga may kalabotan sa panglawas, kay ang husto ug luwas nga tambal maoy yawi sa maayong kahimtangan sa lawas.
