Gitambakan sa Gilas Pilipinas ang Guam sa iskor nga 87-46 sa pagsugod sa unang window sa FIBA Basketball World Cup Asian Qualifiers.
Nanguna sa kadaugan si Justin Brownlee nga nakatala og 22 puntos sa duwa nga gihimo sa Calvo Field House sa Guam.
Nakatala usab si Dwight Ramos og 10 puntos, samtang si June Mar Fajardo nakakuha og walo ka puntos ug 10 rebounds.
Si AJ Edu usab nakatala og walo ka puntos ug walo ka rebounds.
Ang kadaugan usa ka maayong pagsugod alang kang Quentin Millora Brown, nga bag-o pa lang nakasalmot sa national basketball team, diin nakakuha siya og unom ka puntos ug 10 rebounds.
Gikan sa sinugdanan, wala gyud gitugotan sa Gilas nga makalamang ang Guam.
Sa karon mag-andam ang Gilas Pilipinas alang sa ikaduhang duwa batok sa Guam nga pagahimoon sa Blue Eagles Gym sa Disyembre 1.
