Gihatagan og ultimatum hangtod Lunes, Nobyembre 24, si kanhi Ako Bicol Party-list Representative Zaldy Co ug 15 pa nga gi-isyuhan na og arrest warrants may kalabotan sa anomalosong flood control projects.
Gibutyag kini ni Department of the Interior and Local Government (DILG) Secretary Jonvic Remulla human mismo makumpirma ni Pangulong Ferdinand Marcos Jr. niadtong Biyernes nga may gipagawas nang arrest warrant batok kang Co, pipila ka kanhi opisyal sa Department of Public Works and Highways (DPWH), ug pribadong construction firm nga Sunwest Corporation nga nalambigit sa anomalya sa flood control sa Mindoro.
Sumala ni Sec. Remulla, magmugna siya og memorandum order sa dihang madawat na niya ang kopya sa arrest warrants.
Sumala pa sa opisyal, gihatagan nila og higayon ang mga akusado nga mosurender sa labing duol nga ahensiya sa gobyerno hangtod Lunes; ug kon dili sila motuman, ilang dakpon ug buhaton ang tanan aron mahatod kini sa hustisya.
UMahitungod sa pagsilbi sa arrest warrant kang Co nga kasamtangang tua sa gawas sa nasod, wala gitubag ni Sec. Remulla ang posibilidad nga anaa na kini sa Pilipinas ug tingali misulod pinaagi sa “back door.”
Dugang pa niya, ilang adtoon ang mga address ni Co ug i-inspeksyon ang iyang mga negosyo aron tan-awon kon anaa ba siya, ug kon wala, magpadala sila og abiso sa International Criminal Police Organization (Interpol) aron dakpon siya.
Una niini, gipahibalo ni Sec. Remulla nga base sa ilang tracking, nakita si Co sa Japan niadtong milabay nga Lunes, apan mipadulong sa China ug posibleng mibalik sa Europe niadtong Huwebes.
