Gilimod sa grupo sa mga employer ug negosyante ang mga pasangil nga nakig-istorya sila sa bilyonaryong si Ramon Ang aron mahimong caretaker sa nasud tungod sa mga kabalaka sa political instability nga may kalabotan sa isyu sa korapsyon.
Una nga migawas ang taho nga adunay pipila ka grupo sa negosyante nga nakigpulong kang Ang aron mahimong caretaker sa nasud kung adunay pagbag-o sa kasamtangang liderato.
Sa usa ka paghinabi, gibutyag ni Philippine Chamber of Commerce and Industry (PCCI) ug Employers Confederation of the Philippines (ECOP) Director Butch Guerrero nga walay kamatuoran ang mga taho nga gitanyagan si Ramon Ang og caretaker role.
Sa bahin sa PCCI ug ECOP, wala pud kuno sila nagahimo og bisan unsang pagpakigsabot sa negosyante alang sa posibleng leadership role.
Niuna na usab og pamatuod si Ang nga dili siya mosulod sa politika, bisan tuod daghang mensahe ug pipila ka report nga nag-awhag kaniya nga modagan sa public office.
Matod pa ni Ang, ang iyang expertise mao ang negosyo, project development, ug pagtabang sa gobyerno ug mao sumala pa kini ang mga papel nga gusto niyang ipadayon sa umaabot.
