Pormal na nga gisang-at sa Office of the Ombudsman ang unang kaso sa Sandiganbayan nga adunay kalabotan sa anomalosong mga proyekto sa flood control.
Human sa duha ka bulan nga imbestigasyon, pagtigom og ebidensya, ug mga testimonya, gipahibalo karon sa Ombudsman ang pag-isyu niini og resolusyon aron makapasaka og kasong kriminal batok sa pipila ka mga taong nalambigit sa kontrobersiya.
Sumala ni Assistant Ombudsman Mico F. Clavano, gipasakan nila og kasong kriminal si kanhi Ako Bicol Party-list Rep. Zaldy Co, pipila ka opisyal sa Department of Public Works and Highways sa Region IV-B, ug apil ang board of directors sa Sunwest Corporation.
Ang mga kasong gisang-at sa Sandiganbayan naglakip sa Malversation of Public Funds through Falsification of Public Documents ug paglapas sa Section 3(e) sa Republic Act 3019 o Anti-Graft and Corrupt Practices Act.
Samtang si Zaldy Co gipasakahan usab og laing kaso alang sa paglapas sa Section 3(b) sa RA 3019 tungod sa pagdawat niini og ‘unwarranted financial’ o ‘pecuniary benefits’.
Adunay kalabotan ang kaso sa flood control project nga pagtukod sa Road Dike sa suba sa Naujan, Oriental Mindoro.
Gidugang pa ni Assistant Ombudsman Mico Clavano ang rekomendasyon sa Panel of Ombudsman Prosecutors nga dili tugtan nga makapiyansa si kanhi Ako Bicol Party-list Rep. Zaldy Co ug mga kaubanan.
