Wala gihapon mitambong si Sen. Ronald “Bato” dela Rosa sa plenary session sa Senado kagahapong adlawa, Nobyembre 12, 2025.Sa maong sesyon, 18 lamang ka mga senador ang mitambong human mobalik ang Senado gikan sa taas nga Undas break.
Ang padayon nga wala pagsipot ni Dela Rosa nahimong nabantayan human sa kontrobersiya nga nitumaw sa miaging semana nga may kalabotan sa iyang kaso.
Kahinumduman nga gibutyag ni Ombudsman Crispin Remulla nga matud pa adunay arrest warrant nga gipagawas ang International Criminal Court (ICC) batok sa senador.
Apan gilayon kining gilimod sa mga otoridad, nga mibutyag nga walay kamatuoran ang maong impormasyon.
Si Sen. Bato, nga kaniadto mao ang hepe sa Philippine National Police (PNP), usa sa mga nangunang personalidad nga nalambigit sa kampanya kontra droga sa miaging administrasyon.
Ang iyang padayon nga pag-absent sa mga sesyon nakapukaw ug mga espekulasyon sa publiko kabahin sa iyang kahimtang ug sa posibleng epekto sa mga allegasyon batok kaniya.
Apan, gikabutyag na kaniadto sa senador nga andam siyang atubangon ang ICC ug moboluntaryo pa kini nga motabang kang kanhi Pang. Rodrigo Duterte kung sila man duha maapil ug ma-priso sa The Hague, Netherlands.
