Gibutyag ni Senate President Vicente “Tito” Sotto III nga dili mahimong magpatuman og pag-aresto sulod sa building sa Senado batok sa bisan kinsang miyembro sa ilang kapulungan.
Kini nga pahayag nga iyang gibuhat taliwala sa mga report kalabot sa matud pa arrest warrant gikan sa International Criminal Court (ICC) batok kang Senador Ronald “Bato” Dela Rosa.
Dugang pa ni Sotto, ang Senado usa ka demokratikong institusyon nga adunay kaugalingong proseso, ug ang bisan unsang lakang sa pag-aresto kinahanglan nga magpakita og pagtahod sa dignidad sa maong institusyon.
Sa laing bahin, gikanayon ni Ombudsman Crispin “Boying” Remulla nga aduna na kunoy arrest warrant gikan sa ICC batok kang Dela Rosa, kalabot sa mga alegasyon sa crimes against humanity nga may kalabotan sa kampanya kontra droga sa administrasyong Duterte.
Apan bisan pa man, wala pa makumpirma sa publiko sa ICC ang maong warrant, apan nagpabilin nga mainit ang isyu tali sa mga human rights advocates ug sa mga tagasuporta sa kanhing administrasyon.
Sa pagkakaron, hilom pa si Senador Dela Rosa kabahin sa maong isyu, samtang ang Department of Justice (DOJ) mibutyag nga wala pa kini nadawat nga opisyal nga dokumento gikan sa ICC.
Ang ICC usab nagpahayag nga wala pa kini nagpagula og opisyal nga impormasyon kabahin sa warrant of arrest sa senador.
Sumala ni ICC spokesman Dr. Fadi El Abdallah sa paghinabi sa Bombo Radyo, tanang opisyal nga pahayag kalabot niini mugikan lamang sa ilahang opisyal nga buhatan.
