Dakpan ang duha ka indibidwal nga giingong nalambigit sa ilegal nga pag-refill ug pagpamaligya og liquified petroleum gas LPG ug butane canisters sa Barangay Gredu, Panabo City, Davao del Norte, atol sa operasyon sa National Bureau of Investigation – Southeastern Mindanao Regional Office NBI-SEMRO kaniadtong nakalabyng adlaw.
Nasakmit sa mga otoridad ang kapin 1,000 ka ilegal nga refilled butane ug LPG canisters, lakip ang mga hose, regulator, ug uban pang kagamitan nga gigamit sa pagpang-refill.
Sumala ni NBI-11 spokesperson Elias Leaño, duha ka hamtong nga lalaki ang nadakpan samtang padayon pang giimbestigahan ang tag-iya sa negosyong nag-operate sulod na ug duha ka tuig.
Giingon pa nga nakapangwarta ang grupo ug labaw 10,000 pesos matag adlaw pinaagi sa pagpamaligya og butane canisters nga gibaligya lang sa 18 hangtod 25 pesos matag piraso, bisan wala kini safety test ug klarong certification.
Base sa imbestigasyon, nagsugod ang operasyon human makadawat ang NBI ug reklamo gikan sa usa ka concerned citizen nga misumbong sa kadudahang pagpamaligya sa mga butane gas nga walay selyo, walay timbang nga klaro, ug delikado gamiton.
Nagpahimangno karon ang NBI nga ayaw palit ug butane gas gikan sa illegal refillers kay duna nay mga natala nga kaso sa sunog ug pagbusikad sa gas canister tungod kay walay safety standards nga gisunod sa refilling.
Ilang gipasabot nga kinahanglan siguruhon sa mga konsumidor nga lehitimo ug gikan sa approved manufacturer ang ilang mapalit nga gas.
Gidugang sa NBI nga ang peke ug iligal nga butane kasagarang kulang sa timbang, walay selyo ug walay official markings, hinungdan nga makapahimulos ug makadaot sa mga mamalitay.
Ang mga suspek mokaatubang ug kaso ilalom sa Republic Act 11592 o LPG Industry Regulation Act, nga nagbabag sa bisan unsang porma sa pag-refill, pagbaligya o pag-operate sa LPG ug butane gas nga walay permit ug lisensya.
