Nagpaguwa og pahayag ang Miss Universe Organization (MUO) batok sa “special dinner and talk show” nga gihimo ni Nawat Itsaragrisil, tag-iya sa Miss Grand International ug vice president sa MUO sa Asia, human niya ipahibalo sa social media ang online voting diin ang Top 10 nga kandidata nga adunay labing daghan og “likes” sa social media makasalmot sa maong event.
Sumala sa MUO, dili awtorisado ang aktibidad ug ilang gibutyag nga supak kini sa ilang intellectual property rights ug brand integrity. Gipasidan-an usab sa organisasyon ang publiko batok sa mga “misleading” o dili opisyal nga promosyon nga naggamit sa ngalan sa Miss Universe.
Sa laing bahin, mitubag ang Miss Universe Thailand ug nagkanayon nga ang aktibidad kabahin lamang sa ilang “official marketing package” nga gi-awtorisa alang sa mga host country.
Dugang pa nila, gihimo ang maong aktibidad uban sa mga sponsor aron masiguro ang mas patas ug transparent nga pamaagi sa pagpili sa mga mosalmot sa pipila ka aktibidad sa MUO.
Tungod sa pahayag sa MUO, nagka-misunderstanding ang publiko, mao nga ipa-review nila kini sa ilahang legal team tungod posible kini nga makahatag og “potential impact” sa mga sponsors.
