Nalumos ug namatay ang usa ka 40-anyos nga lalaki samtang naligo sa dagat sa Barangay Santa Felomina Baywalk, Cateel, Davao Oriental, alas 6:30 kagabii, Nobyembre 1, 2025 (Sabado).
Sa ulahing report sa Coast Guard District Southeastern Mindanao (CGDSEM), giila ang biktima nga si Harold Clamor, residente sa Barangay Poblacion, Cateel.
Sumala sa imbestigasyon, naglangoy-langoy ang biktima sa baybayon nga hubog, ug nadala sa kusog nga balud, hinungdan sa iyang pagkalumos. Gipasabot usab sa mga otoridad nga sa wala pa kini moligo, nag-inom na kini sa ilang panimalay uban sa pipila ka higala.
Human makit-an ang iyang lawas, girespondehan dayon sa mga sakop sa Philippine Coast Guard Cateel Substation ug mga residente sa lugar ang operasyon.
Gipasidaan karon sa Coast Guard ang publiko nga likayan ang paglangoy sa dagat kon hubog, ug nagpahimangno batok sa kusog nga balod, ilabi na sa gabii, aron malikayan ang susamang insidente.
