2 patay sa nahulog nga eroplano sa runway sa Hongkong

Kumpirmadong namatay ang duha ka mga tawo human mahulog sa runway ang usa ka cargo plane sa Hong Kong airport.

Nailhan ang maong eroplano nga usa ka Boeing 747 cargo plane nga na-slide sa runway sa Hong Kong International Airport, nga maoy hinungdan sa pagkahulog niini ngadto sa parte sa katubigan.

Gipasabot sa mga otoridad nga ang mga namatay wala sa sulod sa cargo plane.

Nasayran nga sila ang sakay sa usa ka patrol car nga nahulog usab sa runway dungan sa maong eroplano.

Nagpadayon ang imbestigasyon sa mga otoridad aron matino ang hinungdan sa maong insidente.