Labing dako nga “Pili nut brittle” sa tibuok kalibutan, giila sa Guinness World Record sa Sorsogon

Giila sa Guinness World Record ang Probinsya sa Sorsogon tungod sa paghimo nila og nut brittle nga labing dako sa tibuok kalibutan.

Kapin sa 200 ka mga volunteers ang nagtapok sa Provincial Gymnasium sa Sorsogon ug gamitan og 1,400 ka kilo nga pili nuts nga gikan sa mga lokal nga mag-uuma.

Pagkahuman sa pipila ka oras nga pagluto, nakamugna sila og pili nut brittle nga nga adunay sukod nga 144.16 square meters, nga tugbang sa 1/3 sa basketball court.

Sumala ni Jerome Dio, acting curator sa Museo Sorsogon ug organizer sa Guinness World Record Official Attempt, ang ilahang tuyo mao nga mailhan ang lalawigan isip Pili Capital sa nasud.

Dugang pa niya nga wala pa’y laing nagtinguha nga maghimo niini, mao nga sila na ang nagbuo sa record.