Subling abrihan ang aplikasyon sa electronic visa (e-visa) alang sa mga Chinese nga magbisita sa Pilipinas sa Nobyembre.
Sa usa ka pamahayag, gipahibalo sa Philippine Embassy sa Beijing nga ang mga Chinese applicants nga magbisita sa nasud alang sa turismo o negosyo mahimong mag-aplay alang sa eVisa kung magpabilin sa nasud dili molapas sa 14 ka adlaw, ug ang ilahang point of entry kinahanglan sa mga paluparan sama sa Ninoy Aquino International Airport (NAIA) o Mactan-Cebu International Airport.
Kung magpabilin man sa nasud nga labaw pa sa duha ka semana, mahimong mag-aplay alang sa conventional visa sa labing duol nga Visa Application Centers nga abrihan sa Beijing, Chongqing, Fuzhou, Guangzhou, Hong Kong, ug Shanghai.
Alang sa pag-submit sa mga requirements, magpagawas ang Embahada sa Pilipinas og mga detalye kabahin sa e-Visa, lakip na ang kabahin nga website ug mga procedures.
Matud pa, unang gisuspendi sa Pilipinas ang pag-issue og e-Visas sa mga Chinese tourists aron mapugngan ang pagdagsa sa mga illegal online gaming workers sa nasud, human sa mga nahimong krimen nga may kalabotan sa Philippine Offshore Gaming Operators (POGOs), nga nagresulta sa pagkasikop sa daghang Chinese nationals.
Sa tuig 2019, ang China ang ikaduhang labing dako nga tinubdan sa foreign tourists sa Pilipinas nga nakaabot og 1.74 milyon.
