Gisupak ni Armed Forces of the Philippines (AFP) Chief of Staff General Romeo Brawner Jr. ang panawagan nga kuhaon sa militar ang ilang suporta kang Pangulong Ferdinand Marcos Jr.
Sa usa ka forum, gibutyag ni Gen. Brawner nga adunay pipila ka mga retiradong opisyal sa Armadong Kusog sa Pilipinas nga miduol kaniya ug naningkamot nga kombinsihon ang mga batan-ong opisyal ug commanders nga moapil sa posibleng military intervention, sama sa kudeta o pagtukod og military junta, aron kuno “i-reset ang tibuok Philippine society” o kuhaon ang suporta sa Pangulo.
Nahitabo kini sa wala pa ang dakong anti-corruption protest niadtong Setyembre 21, nga gisundan sa mga isyu sa anomalya sa mga flood control projects.
Apan, matod ni Gen. Brawner, wala’y aktwal nga kalihokan nga nahitabo atol sa protesta.
Isip Chief of Staff, kompyansa siya nga walay miyembro sa AFP ang motuman sa panawagan sa ubang sektor o indibidwal nga manghilabot sa politika, tungod sa propesyunalismo sa kasundalohan.
Bisan pa man adunay mga panawagan atol sa rally, ilang ipasabot kini sa Pangulo isip Commander-in-Chief, ug wala kini nakaapekto sa pagsalig sa Pangulo sa AFP, matod pa ni Brawner.
Kahinumduman nga una nang gisalikway sa Department of National Defense (DND) ang mga ispekulasyon kabahin sa posibleng plano nga kudeta batok sa administrasyon ni Marcos.
Giinsistir ni Defense Secretary Gilbert Teodoro nga walay miyembro sa AFP nga nagplano niini.
