Usa ka batang babaye gikan sa United Kingdom nga nailhan nga si Olivia Farnsworth giilhan karon sa tibuok kalibutan isip “bionic girl” tungod kay ang iyang lawas adunay talagsaong kondisyon nga wala makabati og kasakit, gutom, ug kakapoy.
Sumala sa mga siyentista, si Olivia mao lamang ang nailhan nga tawo nga adunay rare chromosome 6 deletion nga maoy hinungdan sa iyang kahimtang.
Sa edad nga pito anyos, nahitabo nga nabanggaan ug nadala pa sa sakyanan sulod sa hapit napulo ka kotse ang gilay-on, apan nakatindog ra siya ug walay klarong kadaut. Wala usab siya kabalo kon magutman, busa gikinahanglan nga pahinumdoman siya sa iyang inahan kon panahon na sa pagkaon. Dugang pa, makapabilin siya nga walay tulog sulod sa pila ka adlaw hangtod nga hatagan siya og tambal sa doktor aron mapatulog.
Bisan og delikado ang maong kondisyon ug nagkinahanglan og kanunay nga pagmonitor, giisip usab kini sa mga doktor nga usa ka medical marvel. Gituohan nga ang kaso ni Olivia makatabang sa pagtuon kon giunsa paglihok sa lawas sa tawo ang pagbati sa kasakit, gana sa pagkaon, ug tulog.
Alang sa iyang pamilya ug higala, si Olivia usa lang ka ordinaryo nga bata nga napuno sa kusog ug determinasyon, usa ka “unstoppable kid” nga nagapakita nga mas lig-on siya kaysa sa kasagaran.
