Giingon sa Department of Trade and Industry (DTI) nga kinahanglan na karon nga adunay Philippine Trustmark digital badge ang tanang online sellers sa nasud, lakip na ang nagabaligya sa mga sikat nga online shopping platforms sama sa Shopee, Lazada ug TikTok Shop.
Matod ni DTI Secretary Cristina Roque, ang trustmark seal nagpasabot nga ang usa ka online business mituman sa hustong pamalaod ug maayong e-commerce practices sa Pilipinas.
Ang E-commerce Philippine Trustmark kabahin sa Internet Transactions Act of 2023 ug gisunod kini pagkahuman nga daghang reklamo ang nadawat sa DTI kabahin sa pamaligya sa peke ug substandard nga mga produkto.
Gikompara pa kini ni Roque sa approval seal sa Food and Drug Administration (FDA) alang sa pagkaon, tambal ug kosmetiko.
Gisiguro sa ahensya nga gipahibalo na ang mga e-commerce platforms ug gihatagan og deadline hangtod Setyembre 30, 2025 ang mga online sellers sa pagparehistro ug pag-comply sa requirements sama sa DTI business name registration ug BIR Certificate of Registration.
Apan posible kining ma-extend hangtod sa katapusan sa tuig.
